Notisia

Van Huffelen ta papia ku Unkobon durante bishita

Van Huffelen ta papia ku Unkobon durante bishita

KRALENDIJK- Durante bishita di e sekretario di estado Alexandra van Huffelen, direktiva di e organisashon pa konsumidó na Boneiru, Unkobon, tambe a reuní ku e mandatario.

Durante e enkuentra a duna un bista di e aktividatnan di e último 10 aña ku Unkobon a realisá na interes di e poblashon di Boneiru. Seguidamente Unkobon a pidi atenshon pa e desaroyo preokupante aki na Boneiru manera: oumento drástiko di kosto di bida, e atraso kresiente den e legislashon  pa protehé e konsumidónan manera ta e kaso na Hulanda, e diskrepansia den maneho di supsidio i kontinuashon di e “ijkpuntenbeleid”, e maneho menos eksitoso pa yega na un forma pa redusi e gastunan pa kosto di bida drástikamente.

Krédito

Segun Unkobon ta bisa, nan no tei pa solamente señalá problema, pero tambe pa aportá ku solushon. Den e kuadro aki a informá e sekretario di estado di e plan pa huntu ku Entidat Públiko Boneiru (EPB) funda un fundashon di krédito unda hendenan ku un entrada abou por risibí un fiansa pa konstruí nan propio kas.

Den 2022 Unkobon lo tin komo puntonan di lansa: kon fasilitá e invershon den energia duradero, eliminá e atraso den e derechi di konsumidónan i yega na stipulashon di un minimo soshal basá riba gastonan real di kosto di bida.

Positivo

Unkobon a eksperenshá e kombersashon komo uno plasentero danki na e aktitut positivo i habrí di señora van Huffelen. Komo muestra di gradisimentu presidente di Unkobon, Herbert Piar, a entregá señora van Huffelen un tas di Unkobon.