Notisia

United Airlines ta bula pa Boneiru atrobe

United Airlines ta bula pa Boneiru atrobe

KRALENDIJK- Despues di un ousensia di mas ku un aña, djasabra United Airlines a toka suela di Boneiru atrobe ku un promé buelo.

Meskos ku tabata e kaso promé ku e pandemia di Covid, United lo sirbi Boneiru for di ámbos Houston na Texas i Newark na estado New Jersey. Por lo pronto lo keda na dos buelo pa siman, aunque ta bien posible ku lo sigui ekspandé e kantidat aki. 

Kontentu

Ámbos diputado Hennyson Thielman (turismo), komo direktor di BIA, Jos Hillen a mustra nan mes kontentu ku e regreso di United Airlines. Kolegio Ehekutivo di Boneiru ta mirando un rekuperashon basta fuerte di turismo. Hillen, na su turno, ta nota ku Boneiru ku regreso di United, a rekuperá tur konekshon ku e tabata tin antes di Covid-19. 

BIA ta premirando ku e sifranan di aña 2019, ku tabata esunnan mihó te asina leu pa aeropuerto di Boneiru, lo wòrdu surpasá den último lunanan di 2021.