Notisia

Tourism Corporation Bonaire i nos kampionnan lokal di wentsùrf ta uni forsa pa promové Boneiru

A firma un akuerdo di kolaborashon i merkadeo konhunto

KRALENDIJK – Ku orguyo Tourism Corporation Bonaire (TCB) ta anunsiá nos akuerdo di kolaborashon i merkadeo duradero ku nos wentsùrfistanan lokal premiá Amado Vrieswijk, Elton ‘Taty’ Frans i Youp Schmit.

Riba djabièrnè 17 di desèmber 2021 TCB a seya e dil ku e tres atletanan profeshonal ku a keda rekonosé komo Embahador di Boneiru. Esaki a tuma lugá na The Frans Paradise. Direktor Miles Mercera, na nòmber di TCB a anunsiá e intenshon i vishon den ehekushon di e akuerdo di merkadeo akí ku kada wentsùrfista.

‘Esaki ta inisio di un tremendo kapítulo nobo pa Boneiru. Nos ta agradesido pa e trabou i dedikashon di nos wentsùrfistanan profeshonal lokal ku komo atleta ta enfrentá e reto ku mundu kompleto, pero na mes momentu ta kompartí un pida di loke tur kos ta drai rònt di dje akí na Boneiru. Un komunidat deportivo i kreativo ku nos tur por ta orguyoso di dje i nos ta konbensí ku nos por kompartí e mensahe akí ku tur potensial bishitante for di henter mundu, miéntras ku Taty, Amado i Youp kada biaha ta bai pa un mihó prestashon i ta pone Boneiru riba mapa komo paradiso di wentsùrf’, segun Miles Mercera, direktor di TCB.

TCB ta spera un kolaborashon fruktífero i lo sigui duna sosten na nos hóbennan talentoso di Boneiru ku soñonan i akshonnan ku lo inspirá mundu.

Kampion mundial Amado Vrieswijk: ‘Mi ta super entusiasmá i kontentu ku e sosten i mi ta anhelá e kolaborashon.’ I Taty Frans ta bisa: ‘Tin ora bo no por splika emoshon. Mi ta sinti mi na mes momentu angustiá, honrá, spesial, eksitá i felis. E aventura di kolaborashon akí ku TCB ta algu fantástiko i mi ta kere ku tur kos lo resultá hopi bon. Boneiru ta un isla dushi i trankil i nos

tin ku represent’é riba henter mundu. Mi ta agradesido i e biahe por start
sali numa.’ E embahadornan ta hopi kontentu ku e oportunidat akí ku ta
bentahoso pa ámbos partido i nan ta entusiasmá tokante e hopi aktividatnan ku tin planiá pa 2022.