Notisia

Ta bai raportá sifra di COVID-19 un bes pa siman for di awor

Ta bai raportá sifra di COVID-19 un bes pa siman for di awor

KRALENDIJK- For di 14 di mart 2022 ta publiká e kantidat di kontagio ku e vírùs di corona ún biaha den siman riba djaluna. Ta un resúmen di e siman anterior. 

For di e siman aki no ta publiká e sifranan di kontagio diariamente mas, ta publiká e resúmen di e siman akí otro siman. Na Boneiru e kantidat di kontagio ku e vírùs di corona a baha konsiderablemente. Den kaso di kantidat abou, un resúmen semanal ta duna un mihó bista di kontagionan, asina e departamento di Salubridat Públiko ta laga sa.

Debí na e kantidat abou di kontagio, for di 4 di mart 2022 a eliminá tur medida di corona.
Den e fase nobo akí ta keda importante si pa sigui e reglanan básiko. Ta keda importante pa
laba man regularmente. Ora ta tosa òf nister, mester tapa boka òf nanishi ku e parti paden di èlebog. Ta posibel tambe pa usa un lensu di papel i benta esaki afó mesora despues di uso. Mester laga bientu pasa den espasionan paden i ofisina kaminda hende ta bini huntu.

Vulnerabel

Den e tempu akí ta importante pa tene èkstra kuenta ku hendenan vulnerabel. Ke men ku
grandinan i otro hende ku tin problema médiko serio. Si hendennan vulnerabel kontagiá ku e vírùs di corona, nan por bira hopi malu. E mihó kos ta pa bishitantenan di hende vulnerabel hasi un tèst propio promé ku nan bai di bishita. Ta konsehabel tambe pa bisti un tapaboka durante e bishita.