Notisia

Sektor turístiko ta boga pa obligashon di registrashon pa Airbnb

KRALENDIJK – BONHATA (Bonaire Hotel and Tourism Association), komo representante di sektor turístiko na nos isla, ta boga pa un obligashon di registrashon pa wèpsaitnan manera Airbnb, Booking.com i Vrbo. E obligashon pa registrashon ta un medio pa kombatí kompetensia inhustu i pérdida di entrada di impuesto debí na personanan ku ta hür bibienda ku finnan vakashonal i pa evitá e tipo di turista ku ta kontribuí relativamente tiki na ekonomia di Boneiru. 

Na Boneiru tin hopi bibienda, apartamento i studio ku nan ta pone na hür via plataformanan online. E personanan ku ta pone e kasnan akí na hür hopi biaha no ta kobra ni entregá impuesto di turista. Di e manera akí nos isla ta pèrdè sèn i esaki ta kondusí na kompetensia inhustu kompará ku hotèlnan i risòrtnan ku sí ta kobra i entregá impuesto. Hürmentu di bibienda pa finnan vakashonal den áreanan ku ta destiná komo área residensial ta prohibí na Boneiru, pero kontròl riba esaki ta minimal.

Kumpra un di dos kas pa hür pa un término kòrtiku ku turista ta atraktivo, pasobra e ta sóru pa un bunita entrada èkstra. Sinembargo e ta pone mas preshon riba e merkao di bibienda ku ya ta difísil kaba. E situashon aki ta pone ku pa hopi habitante di Boneiru, e ta bira difisil pa kumpra un bibienda pagabel.

Banda di esei hürmentu di bibienda pa finnan vakashonal den barionan residensial na Boneiru hopi biaha ta okashoná molèster pa habitantenan di e besindario. E kas i barionan no ta trahá pa esaki i hopi biaha no tin ningun hende ku ta hala atenshon di e esnan ku ta hür bibienda pa finnan vakashonal riba nan responsabilidat.

Obligashon di registrashon ta yuda tambe pa haña un bon bista di e kantidat di kama i kambernan ku Boneiru im disponibel. E informashon akí ta importante paso e ta yuda pa duna direkshon stratégiko na e desaroyo den sektor turístiko. E kantidat di kama i kamber di hotèlnan i risòrtnan ta konosí, pero dor ku no ta registrá esaki den kaso di hürmentu lòs di studio i apartamento, e kantidat real ta diskonosí. 

Tokante esaki direktiva di BONHATA ta bisa: ‘Awor akí personanan ku ta hür bibienda ku finnan vakashonal den barionan residensial kasi no ta paga impuesto, pasobra práktikamente no tin kontròl riba esaki. Esaki ta kompetensia inhustu pa hotèlnan i risòrtnan ku sí ta hasi esaki. Obligashon di registrashon ademas lo kondusí na un mihó; habitabilidat den barionan residensial, ménos molèster di turista den barionan, e ta krea posibilidat bek pa hende lokal tambe por hür òf kumpra un bibienda i  e ta sòru ku kada turista ku bishitá nos isla ta paga impuesto di turista manera ta e kaso na hopi otro paisnan.’

Na Amsterdam for di 1 di òktober 2021 solamente personanan partikulir ku a registrá na e munisipio por ofresé nan bibienda na plataformanan di hür manera Airbnb, Booking.com i VRBO. Pa e motibu akí e kantidat di akomodashon disponibel na Amsterdam na e lokalidatnan akí a baha ku 75%. Espektativa ta ku introdukshon di un obligashon di registrashon na Boneiru tambe lo kondusí na un redukshon di hürmentu di bibienda ku finnan vakashonal no regulá.