Gobernashon

Sekretario di Estado Van Huffelen a bishitá Plenchi di Trabou

Sekretario di Estado van Huffelen a hisa glas huntu ku Susan Willems di Plenchi di Trabou na okashon di e bishita i un aña di eksistensia. Pòtret: ABC Online Media

KRALENDIJK- Djaluna atardi sekretario di estado pa asuntunan interior i di Reino (BZK), Alexandra van Huffelen a hasi un bishita na Plenchi di Trabou. E organisashon, pa kasualidat, ta selebrando tambe su promé aña di eksistensia.

Van Huffelen a kòmbersá no solamente ku e hefe di Plenchi di Trabou, Susan Verissimo Filipe Willems, pero tambe ku dos persona ku a logra haña un trabou nobo via di e organisashon.

Bunita

“Mi ta gosa e organisashon aki, pero tambe e trabou ku e ta hasiendo. Mashá bunita, i tambe importante”, asina Van Huffelen a bisa durante e kombersashon. Van Huffelen a rekonosé ku ketu bai probresa ta un di e retonan grandi na e islanan BES, inkluyendo Boneiru.

Van Huffelen, den kòmbersashon ku Awor Bonaire a konfirmá ku redukshon di probresa sigur lo ta un di e puntonan di lansa di dje komo sekretario di estado pa asuntonan Interior i di Reino. “Pero mi ke enfatisá tambe ku ta un trabou den grupo, huntu ku diferente kolega den nos Gabinete. Mi tin ku bisa ku tin vários mandatario ku ta sinti un amor grandi a e islanan Hulandes den Karibe, i huntu nos ke traha riba mehorasho di vários punto.

Brindis

Na final di e bishita tabata tin un brindis pa selebrá e promé aña di eksistensia di Plenchi di Trabou. Van Huffelen, durante su bishitá a wòrdu akompañá entre otro pa representante interino di Reino, Jan Helmond, i tambe Direktor General di Ministerio di BZK, Henk Brons.