Notisia

Rijksvastgoedbedrijf ta bende edifisio ku ántes tabata warda di polis di Rincon

KRALENDIJK – E edifisio ku ántes tabata e warda di polis di Rincon ta bai na benta. Despues ku polis a sali for di e edifisio, esaki a keda bashí pa hopi aña i a kai den deterioro. Gobièrnu Hulandes i gobièrnu lokal no tin uso mas pa e edifisio i pa e motibu ei ta bende esaki pa medio di un inskripshon públiko.

E edifisio ku ántes tabata e warda di polis di Rincon, ta situá banda di e fèlt di futbòl di Rincon i na e kaya ku ta konektá Kralendijk i Rincon. E la keda konstruí na 1984 i tin un superfisie di alrededor di 348 m². E parsela kaminda e edifisionan ta konstruí, tin un superfisie di 7.170 m². E destinashon aktual ta Edifisionan Sosial – Atministrativo. 

Pa funshonnan nobo i uso posterior, probablemente un kambio di destinashon den e plan di zonifikashon ta nesesario. E Entidat Públiko Boneiru (OLB) a indiká ku un variashon amplio di opshon ta posibel. E destinashon final ta dependé di e kumpradó, basta OLB ta bai di akuerdo ku e plannan. 

Pa e benta a skohe pa un inskripshon públiko; asina tur partido ta haña chèns igual riba kompra di e pòst anterior di polis. Interesadonan mester hasi nan propio investigashon di e viabilidat di nan plannan i loke nan ta dispuesto i por paga pa e parsela i edifisionan. Pa por bende e propiedat ta importante ku ta ofresé un preis konforme e merkado. Pa Rijksvastgoedbedrijf (RVB), ku tin un mandato di derecho privá, no ta posibel pa regalá e edifisio i tereno. 

Debí na e nesesidat di un investigashon amplio, e inskripshon públiko ta sera despues di aproksimadamente 5 luna, riba 15 di Ougùstùs 2022 pa 11:00 AM. Potrèt i informashon tokante e tereno i edifisionan, e prosedimentu di benta, informashon di investigashon i dibuhonan ta disponibel via www.Biedboek.nl. Aki por download tur dokumento, inkluso e formulario di registrashon. Mester yena esaki kompleto i entregá e formulario na tempu den un ènvelòp será na ofisina di mr. Kenneth F. Arends & Partners, notario na Boneiru. 

Despues di e inskripshon e notario ta traha un rapòrt i RVB ta tuma un desishon. Si RVB disidí di bende, por entregá e tereno i edifisionan djis despues pa e doño nobo. 

Interesadonan ku no por mira i/òf download e dokumentonan, por wak e dokumentonan durante e dianan di bishita òf serka e notario. Eventualmente por optené un formulario di inskripshon serka e notario tambe. 

Dianan di bishita ta riba 29 i 31 di mart di 11.30 pa 13.30 or.