Notisia

Rapòrt tokante Rotònde-gate probablemente te yanüari 2022

Rapòrt tokante Rotònde-gate probablemente te yanüari 2022

KRALENDIJK- Hopi siudadano, pero tambe miembronan di Konseho Insular, pa basta tempu ta sperando presentashon di resultadonan di loke a wòrdu yamá un ‘investigashon atministrativo’. tokante e responsabelnan pa e manera ku kosnan a kana pa ku e rotònde frakasá riba Kaminda Amsterdam. 

Den promé instante e resultadonan lo a wòrdu presentá den promé siman di desèmber, pero den último simannan no a skucha nada mas tokante esaki. Informalmente, Awor Bonaire ta komprondiendo ku ta hopi probabel ku e resultadonan ta wòrdu presentá na yanüari 2022, i no mas pa e aña aki.

Indigná

Spesialmente miembro di Konseho Insular, Daisy Coffie, na varios okashon a mustra su mes bastante idigná pa e manera ku kosnan a kana ku e proyekto. Coffie a dirigí diferente karta na entre otro Kolegio Ehekutivo, pa duna mas informashon i pa tene un hende responsable pa e debakle. 

Coffie ta mira un responsabilidat tambe serka gezaghèber Edison Rijna, ya ku e promé mandatario ta responsabel pa integridat den Entidat Públiko. 

Diputado James Kroon, direktamente responsabel pa infrastruktura, te asina leu a laba su man pa ku e proyekto. Milagrosamente, tur hende ku tabata involví den e proyekto a bisa di a ‘lubidá’ kon kos a kana i ken a firma, por ehèmpel, pa e modifikashon na e diseño original.