Gobièrnu

Proyekto piloto ku supsidio di hür den sektor privá ta bai start

KRALENDIJK- Djabièrnè atardi a tuma lugá inisio di un proyekto piloto pa duna supsidio di hür na hürdónnan den sektor privá.

Durante e enkuentro ku prensa, a duna splikashon riba e proyekto. “Nos tur ta kontentu ku por ehekutá e proyekto piloto aki. Esaki lo yuda baha gastu i oumentá entrada. Esaki ta un aporte kaminda e hürdó di kas/apartamentu, ta haña un suma pa paga kaminda nan ta biba”, asina diputado Nina den Heyer a splika.

Personanan ku ta hür kas ku no ta di Fundashon Cas Boneriano, ku tin un entrada ku no ta suprasá 1350 dòler pa luna, por bini na remarke pa e forma di supsidio nobo. Te asina leu, supsidio di hür tabata solamente optenibel pa hende ku ta hür kas di FCB, pero hopi hende ainda no por bin na remarke pa un kas di FCB i ta dependé di hürmentu di un kas den sektor privá.

Papel

Pa por bin na remarke, ámbos e doño di e kas, i e hürdó tin ku firma sierto papel pa por bini na remarke. Por yena e petishon, yenando formulario ònlain via www.bonairegov.com. Personanan ku ta haña esaki difísil por pasa tambe personalmente na direktorado di Kuido.

Despues di seis luna, lo bai evaluá e areglo di supsidio aki, pa wak kon ela funshoná te asina leu.