Notisia

Pasashi pa Kòrsou lo bolbe subi riba termino korto

Pasashi pa Kòrsou lo bolbe subi riba termino korto

KRALENDIJK- Ku tur probabilidat e preis di pasashi pa bai Kòrsou bin, lo bolbe bira un poko mas karu ku nan ta kaba. 

Motibu di e oumento ta un sobrekargo ku gobièrnu di Kòrsou ke implementá riba pasashi pa kubri gastunan di Curaçao Civil Aviation Authorities (CCAA).

Según minister di Transporte, Charles Cooper, mester kontratá masomenos 8 a 9 hende nobo pa CCAA, pa perkurá ku e outiridat kumpli ku e normanan ku Federal Aviation Administration di Merka ta apliká  pa subi e isla bèk pa e asina yama Category-1. E sobrekargo lo yuda paga e gastunan èkstra di empleado. 

Asina, huntu ku e airport tax di Kòrsou ku tambe a oumentá resientemente, e parti di impuesto riba kada pasashi lo bira atrobe un poko mas grandi. 

Kategoria-1

E asina yamá kategoria 1 ta importante pa Kòrsou pasombra sin dje, aerolíneanan lokal no por kuminsá bula rutanan nobo for di Kòrsou pa Merka. E bahada di kategoria 1 pa kategoria 2 ketu bai ta wòrdu mirá komo un faktor importante ku finalmente a kondusí na bankarota di Insel Air.