Notisia

Mayoria hende lo paga mas impuesto na aña 2022

Mayoria hende lo paga mas impuesto na aña 2022

KRALENDIJK- Mayoria siudadano lo paga mas impuesto den añan 2022 den komparashon ku añanan anterior. Esaki ta wòrdu kousá dor di adaptashon den e montantenan ku por deskontá for di entrada na momento di entregá papel di impuesto.

Sinebargo, tambe lo tin un efecto pa esnan ku ta kobra nan salario mensualmente via doño di trabou, ya ku e montantenan aki mester wòrdu yená na komienso di aña den sistemanan pa prosesá salario. Pa ta eksakto ta trata di e asina yamá belastingvrije som, o sea e suma di entrada riba kua no ta paga impuesto, i tambe -pa hende grandi- e oudertoeslag ku a baha.

Aunke serviso di Impuesto no a komuniká apsolutamente nada tokante esaki, pa hende por komprondé dikon nan salario nèto ta baha entrante promé di yanüari 2022, un eksperto konsultá pa ABC Online Media ta bisa ku probablemente e inflashon negativo di aña 2020 awor numa lo a wòrdu prosesá na servisio di impuesto pa loke ta trata montantenan ku ta apliká pa kalkulá kuantu un hende mester paga na impuesto.

Konkreto

Pa loke ta trata sumanan konkreto, ta nota ku e asina yamá belastingvrije voet a baha di 12.575 dòler pa aña pa 12.197 dòler pa aña. E ouderentoeslag ta baha di 1.421 pa 1.378 dòler pa aña.