Notisia

LVV Boneiru ta bai produsí yerba komo kuminda pa bestia

Empleadonan di LVV trahando duru riba e sistema di irigashon nobo. Pòtret: LVV

KRALENDIJK- E servisio di LVV na Boneiru ta bai produsí yerba ku por duna komo kuminda na bestia pa kriadónan di bestia na Boneiru.

Aktualmente ta konstruuyendo un sistema di irigashon ku tin ku hasi e kultivo di e yerba posibel. E tereno ku ta bai usa pa e meta aki, tin un grandura di 3 hektar. 

Segun direktor di LVV, Maurice Adriaens ta splika, e yerba por yuda e kriadónan di bestia riba e isla. Lógikamente importashon di kuminda di bestia ta karu, mientras ku lokalmente no tin tantu ta krese ku por yuda alimenta bestia. 

Israel

E sistema di irigashon ku ta poniendo actualmente ta un sistema desaroyá na Israel. Esaki ta wòrdu poné 30 sentimeter bou di tera i lo usa 30% menos awa ku sistemanan mas tradishonal.