Notisia

Kolegio Ehekutivo ke akuerdo atministrativo nobo ku Hulanda 

Kolegio Ehekutivo ke akuerdo atministrativo nobo ku Hulanda 
Kolegio ehekutivo riba trapinan di bestürskantor huntu ku Van Huffelen

KRALENDIJK- Kolegio ehekutivo ta mira un akuerdo atministrativo (bestuursakkoord) nobo, entre entidat públiko Boneiru i Reino komo un manera para realisá su vishon. Segun a komuniká ku secretario di estado, Alexandra van Huffelen, Boneiru mester bira un lugá kaminda suidadanonan ta felis, salú i próspero. 

“Awor ku e Akuerdo Intergubernamental ta yegando su fin Entidat Públiko Boneiru ta sinti nesesidat pa prolongá e akuerdo aktual i hasié mas efektivo. Den e tempu binidero ta sigui papia mas aleu ku Reino tokante Boneiru su ambishonnan”, asina BC a skibi den un relato di prensa riba djamars. 

Den e ambishonnan ku Entidat Públiko Boneiru a anunsiá awor akí ta konektá e efektonan sosial deseá na prioridatnan di Entidat Públiko Boneiru. Esakinan ta entre otro disponibilidat di energia pagabel i sostenibel, oportunidat igual pa desaroyo kompleto, desaroyo pa suidadanonan di Boneiru ku atenshon spesífiko pa mucha, transporte públiko disponibel i pagabel i un plan di parselashon ku ta ofresé sufisiente espasio pa biba, traha i rekreashon. 

Kolegio Ehekutivo ke atendé tambe ku e estado malu di edifisionan di gobièrnu i kamindanan. Den e ambishonnan deskribí Kolegio Ehekutivo ta bisa di ke sòru pa kaminda seif i bon transitabel. Tokante esaki mester hasi palabrashon pa eliminá e retraso den mantenshon.

Meta

Punto di salida di e vishon di Entidat Públiko Boneiru ta e Metanan di Desaroyo Sostenibel (SDG’s). Ku e metanan akí e paisnan miembro di Nashonnan Uní ta traha pa mas tardá na aña 2030 pone un fin na pobresa ekstremo, desigualdat i inhustisia i atendementu ku kambio di klima. Kolegio Ehekutivo di Boneiru ta di akuerdo ku e metanan akí.

Plan Maestro

Un poko remarkabel ta ku Kolegio Ehekutivo, diripiento a kuminsá papia di e Master Plan òf plan maestro ku lo mester stipulá e kaminda ku ke yega. Manera ta konosí a gasta basta plaka den añanan tras di lomba pa kompilá e Masterplan, sin ku esaki a keda kla nunca. 

Akuerdo

Pa logra e ambishonnan akí Kolegio Ehekutivo ta ekspresá e deseo pa huntu ku Reino traha riba un Akuerdo Intergubernamental nobo pa realisá e Metanan di Desaroyo Sostenibel. Konhuntamente Entidat Públiko Boneiru ta stipulá e metanan pa e periodo di gobernashon ku falta ainda i ku ta terminá na luna di mart 2023.