Notisia

Kantidat di tèst positivo ta keda relativamente haltu na Boneiru

Kantidat di tèst positivo ta keda relativamente haltu na Boneiru

KRALENDIJK- Aunke ku e kantidat total di kaso aktivo di Covid-19 ta sigui baha levemente, por nota ku e kantidat di tèst positivo, ta keda relativamente haltu si ta tuma na konsiderashon e kantidat di hende ku a pasa tèst. 

Asina por a nota ku djasabra mas ku un kuart (25,9%) di tur tèst a sali positivo. Riba djadumingo esaki tabata e kaso den kasi 20% di tèst ku a prosesá.

Kòrsou 

Voral si kompará e sifra aki ku esun na Kòrsou ku ta lora mas banda di 1 pa 2%, por konstatá ku Boneiru ainda ta leu for di kontené e brote aktual. 

Mientrastantu, rònt mundo ta tomando medida pa frena plamamentu di e variante nobo, Omikròn. Na Boneiru tambe, for di djarason awor, lo tin eksigensia hopi mas estrikto pa biahero for di entre otro Hulanda i Merka. Nan mester hasi un tèst di PCR no mas largu ku 48 ora promé ku e biaha. Banda di esaki mester hasi un tèst na kas despues di a yega Boneiru i despues di 5 dia, mester bolbe pasa un tèst di PCR na un di e kompanianan lokal ku ta ofresá esaki.

Tur e tèstmentu ta nifiká un gastu èkstra basta considerabel pa e biaheronan ku ke biaha bai Boneiru pa pasa fakansi.