Notisia

Kantidat di studiantenan di MBO Bonaire a subi drástikamente

KRALENDIJK – MBO Bonaire tin kasi 50% mas studiante ku kuater aña pasá. Esaki ta danki spesialmente na e oumentoenorme di e kantidat di studiante BBL. Na 2017 nan tabata 10 i den 2021 nan ta 203. 

Despues di 2017 MBO Bonaire a tira un bista krítiko riba tur estudio. A stòp vários estudio pa bolbe pone kalidat di enseñansa na òrdu. Na mes momentu MBO Bonaire a krea diferente estudio BBL nobo. Esaki nan ta hasi den kolaborashon ku sektor empresarial, pa konektá bon ku e demanda riba merkado. 

Un bon ehèmpel di esaki ta e estudio nobo pa agente di siguridat. For di gobièrnu i e sektor di siguridat partikular, pa años kaba tabatin demanda pa un bon estudio MBO pa agente di siguridat. Den kolaborashon estrecho ku Rijksdienst Caribisch Nederland, JICN, organisashonnan di siguridat partikular, ROA i SVPB, MBO Bonaire a analisá kontenido di e estudio. Di e manera akí a desaroyá un estudio ku ta kumpli kompletamente ku eksigensianan di èksamen i e situashon insular na Boneiru. E estudio BBL pa agente di siguridat a kuminsá e aña eskolar akí ku 25 studiante.

E estudionan BBL Kinderopvang (Kuido di mucha), Techniek (Téknika) i Juridisch Medewerker (Kolaboradó hurídiko), tambe a realisá despues di un petishon di merkado. 

Liset de Keijzer, direktor di unidat di MBO Bonaire, ta splika: “Hopi biaha un organisashon ku tin deseo/nesesidat di personal kapasitá, ta aserká nos. Nos ta sali investigá si e demanda tin base amplio i kiko ta e posibilidatnan pa organisá un estudio ku ta konektá. Asina na e momentu akí nos ta investigando si e isla tin nesesidat di un estudio den retail (komèrsio di detaya). Dje forma akí MBO Bonaire ta aspirá pa sigui profeshonalisá e isla i su forsa laboral.’ 

Den un estudio BBL studiantenan ta kombiná trabou ku skol. “Esaki no semper ta algu fásil. Tòg ta remarkabel ku kuantu entusiasmo nos studiantenan BBL ta bai skol atrobe. Nos tin mashá atmirashon pa nan perseveransia pa kombiná skol, trabou i famia.”

MBO Bonaire semper ta pará habrí pa un kòmbersashon sin obligashon ku sektor privá. Bishitá www.mbobonaire.com/bedrijven pa mas informashon i datonan di kontakto.