Telekomunikashon i pòst

Gregory Colina direktor nobo di TELBO

KRALENDIJK– Gregory Colina a wòrdu nombrá komo direktor nobo di e kompania di telefon na Boneiru, TELBO N.V. Esaki a keda anunsiá djaluna mainta pa Bonaire Holding Maatschappij (BHM) ku ta akshonista di e kompania di gobièrnu.

BHM ta bisa di ta kontentu di por anunsiá esaki, despues ku pa mas ku 12 aña no tabata tin un propio direktor statutario na e kompani.

For di promé di yüni 2009 BHM tabata temporalmente formalmente enkargá ku maneho di e kompania Telbo NV en espera di un direktor statutario nobo. Apesar di diferente intento den pasado  pa rekrutá i nombra un direktor statutario nobo, esaki no a logra. Pa e motibu aki aña pasá a start  atrobe ku un trayekto di rekrutamentu i selekshon a base di un profil di funshon ku akshonista a stipulá.

Prosedura

Di e mas ku 20 solisitut risibí, a skohe 6 kandidato potensial a base di un selekshon di karta i promé entrevista dor di e kompania Linkels & Partners. Despues di e promé buelta di selekshon, diferente kombersashon mas i ‘assessment’ a kontinuá kaminda un komishon di evaluashon a skohe señor Colina komo e kandidato mihó kualifiká pa okupá e funshon aki. E komishon di evaluashon a raportá esaki na e hunta di komisario. Despues di a analisá e rapòrt aki, hunta di komisario a sigui e konseho di e komishon di evaluashon i a nominá señor Colina na e akshonista.

Eksperensia

Señor Gregory Colina tin mas ku 25 aña di eksperensia ku telekomunikashon i konosementu amplio di e materia tékniko. E tin un diploma di ‘Master of Science in Global Management’ ku spesialisashon den ‘Business Innovation’. Durante su karera señor Colina a krese di business unit manager ‘IT Support Services’ i manager ‘Customer Care’ te ku ‘deputy Chief Operational Officer’ na un di e kompanianan di telekomunikashon di mas grandi riba nos islanan den Reino Hulandes.

Banda di su spesialisashon riba e tereno di telekomunikashon, señor Colina ta hopi aktivo riba e tereno di guia i formashon musikal, loke ku parsialmente tambe a kontribuí na su nombramentu komo ‘Ridder in de Orde van Oranje Nassau’.

Benefisio

Segun BHM ta bisa den un komunikado pa prensa, e konosementu i eksperensia amplio komo tambe e embolbimentu sosial di señor Colina lo ta na benefisio di Telbo NV i e komunidat Boneriano pa kue un rumbo nobo ku servisio di telekomunikashon ku lo ta di pueblo i pa pueblo ofresé dor di e kompania di telekomunikashon Telbo NV.