Notisia

Gobièrnu di Saba tambe ta protestá oumento di impuesto riba entrada

Gobièrnu di Saba tambe ta protestá oumento di impuesto riba entrada

THE BOTTOM- Gobièrnu di Saba a manda un karta pa secretario di Estado, Marnix van Rij, tokante e oumento indirekto di impuesto riba entrada, ku a drenta na vigur promé di yanüari 2022. A manda un kopia di e karta pa secretario di estado Alexandra van Huffelen, ku ta enkargá ku asuntonan di Reino.

Den nan karta Kolegio Ehekutivo di Saba ta mustra riba e echo ku entre otro e bahada di e suma riba kual no ta paga impuesto no ta yudando den kombatimentu di pobresa riba e islanan. Tambe Saba ta protestá e echo ku niun hende òf instansia a informá gobièrnunan di e islanan BES. 

“Bisa ku e ta algu outomátiko no ta un argumentu bálido pasombra SZW tampoko a baha sueldo mínimo pa motibu ku inflashon na 2020 a baha, ni tampoko BZK no a baha e prosupuesto di vrije uitkering kuta duna tur aña.

Rekonsiderá

Den nan karta Gobièrnu di Saba ta hasi un apelashon riba Van Rij pa drei bèk e desishon pa ku bahada di vrije uitkering. “E ambishon di gobièrnu di Hulanda tambe ta pa yuda kombatí pobresa i e medidanan aki, ta bai kontra di esei”, asina diputado di Finansas, Bruce Zagers, ta bisa.