Notisia

Gezaghèber ta mira lus na final di túnel pa loke ta trata infrastruktura

Gezaghèber ta mira lus na final di túnel pa loke ta trata infrastruktura

KRALENDIJK- Den e último boletín speshal di gobièrnu di Boneiru pa loke ta trata infrastruktura, gezaghèber Edison Rijna ta mustra su mes optimista ku e progreso ku a logra i ku lo bai logra otro aña ora ta trata di nos infrastruktura.

“Riba   14   di   novèmber   2018   a   firma   e Akuerdo    di    Gobernashon    2018-2022. Den    kapítulo    4.1    di    e    Akuerdo    di Gobernashon tin palabrashonnan por eskrito tokante di e manera pa atendé di un forma struktural ku e retraso den mantenshon di kareteranan di Boneiru”, asina Rijna a splika. 

Segun gezaghèber, despues di e parti organisatorio na komienso di e programa, a start ku ehekushon di e programa den luna di mart   2021.   “Durante   di   ehekushon   di   e programa ta bai enfoká riba e lista di prioridat i terminá esaki dentro di 2 aña. E adelanto pa loke ta trata trabounan di mantenshon, ku a ser hasí te na e momentunan aki, ta notabel i esaki ta solamente e komienso”.

Kunuku i kaya di tera

A pesar di e logronan na aña 2021, segun Rijna, tin hopi mas trabou ku tin ku bai tuma lugá. “Den e añanan binidero lo amplia e aktividatnan den kuadro di infrastruktura, kaminda ta bai enfoká riba aksesibilidat, sostenibilidat i seguridat  di   e   kayanan   di   Boneiru”.

Según Rijna kamindanan di tera i kamindanan di kunuku tambe ta ser atendé na un manera struktural pa por brinda e komunidat Boneriano un mihó perspektiva.