Notisia

Gezaghèber Rijna ke hasi laso ku Union Oropeo mas estrecho 

Gezaghèber Rijna ke hasi laso ku Union Oropeo mas estrecho 
hul

KRALENDIJK – Boneiru no ta forma parti di Union Oropeo, pero por probechá sí di fondonan di Union Oropeo. Pa e motibu akí gezaghèber Edison Rijna a disidí pa hasi e laso ku institushonnan na Brussel mas estrecho.

‘E impreshon ta eksistí ku nos ta laga oportunidatnan drumi. Komo isla chikitu fásilmente nan ta lubidá di tene kuenta ku nos i p’esei nos tin ku laga nan tende mas tantu biaha di nos’, segun gezaghèber Rijna kende pa e motibu ei a interumpí su bishita na Den Haag pa konsulta ku vários partner ku ta importante pa Boneiru na Brussel, e kapital di Union Oropeo.

Djaluna tabatin un resepshon serka e representashon permanente di Reino na Brussel riba programa. Nan a papia tokante kiko e representashon por nifiká pa Boneiru, por ehèmpel den kaso di hasi e kontaktonan korekto.

Riba e di dos dia gezaghèber Rijna tabatin entre otro un enkuentro ku e tim di Union Oropeo ku ta responsabel pa e ret di satélite di Galileo, di kua e stashon na tera ku nan ta bai konstruí na Boneiru ta forma parti. Mas aleu el a bishitá ofisina di Asosashon di Paisnan i Teritorionan Ultramar (Association of Overseas Countries and Territories – OCTA) ku ta atendé ku interesnan di e paisnan i teritorionan ultramar na Brussel.

Resientemente gezaghèber Rijna a tuma e funshon di Territorial Authorized Officer (TAO) pa Boneiru na Union Oropeo over for di diputado Thielman. A tuma e desishon akí pa salbaguardá kontinuidat di e relashon di kolaborashon ku Brussel.