Notisia

Fondo adishonal pa naturalesa di Karibe Hulandes

Fondo adishonal pa naturalesa di Karibe Hulandes

KRALENDIJK – Dutch Caribbean Natura Alliance (DCNA) i Wereld Natuur Fonds (WWF-NL) ta kontentu ku e fondo pa protekshon di naturalesa den Karibe Hulandes ku e gabinete a reservá pa e periodo di gobernashon benidero. Siman pasá a bira konosí kon gobièrnu ta bai destiná spesífikamente e mas ku 35 mion èkstra pa naturalesa na Karibe Hulandes, manera ku ta pará den e akuerdo di gobernashon.

Ta pone e mas ku 35 mion disponibel pa implementashon di e Natuur- en Milieubeleidsplan (NMBP) Caribisch Nederland/Plan di Maneho pa Naturalesa i Medioambiente Karibe Hulandes. E NMBP akí ta un programa ambisioso pa naturalesa i medioambiente ku ta kana te ku 2030. Banda di e kontribushon pa naturalesa a hinka tambe un pòst struktural di 30 mion pa aña den e akuerdo di gobernashon pa protekshon di kultura i naturalesa na Karibe Hulandes. Lo por usa esaki pa atendé tópikonan di término largu manera kloaka i rekohementu di sushi.

“Nos ta sumamente agradesido ku a reservá dies mion den e presupuesto pa refuerso di maneho di parkenan di naturalesa na Boneiru, Saba i Statia” segun Tadzio Bervoets, director di DCNA, ku ta e organisashon kapa, bou di kua tur e parkenan nashonal di e seis islanan di Karibe Hulandes ta kai.  “Esaki ta demonstrá mas prinsipalmente e importansia ku e parkenan tin den konservashon di naturalesa, riba i rondó di nos islanan. E speransa ta ku esaki ta kondusí na un refuerso struktural pa e parkenan di naturalesa. No solamente pa Hulanda Karibense pero den futuro tambe pa Aruba, Kòrsou i St. Maarten”. 

Paso serio

“Ku e sèn akí por tuma pasonan serio pa protehá e biodiversidat frágil” segun Arjan de Groene, Kordinadó di Paisahe di Hulanda Karibense, di WWF-NL. “Gustosamente nos ta traha huntu ku e minister i e mandatarionan lokal i organisashonnan pa duna un bon kontenido pa e fondo. Lo ta bon ku nos por tene kombershonnan riba esaki denter di poko.”

Naturalesa den e parti Karibense di Reino ya pa añanan ta bayendo atras. Riba tera naturalesa a sufri daño pa motibu di eroshon i oumento kontinuo di konstrukshon. I bou di awa e refnan di koral ta bai duru atras pa motibu di polushon i kambio di klima. E fondo nobo aki ta hopi nesesario pa hasi e naturalesa salú atrobe.