Notisia

EZ Air ta risibí di dos avion Saab340

Di dos avion Saab yegando na aeropuerto di Kòrsou djarason mainta. Pòtret: Larry Every.

WILLEMSTAD- Djarason mainta, algu promí ku 8 or, a baha na aeropuerto di Kòrsou e di dos avion Saab di EZ Air ku registrashon N417 XJ. Algun luna pasá e promé avion Saab a yega, i esaki ta den operashon kaba. Pronto e di dos Saab tambe lo bai wòrdu hinká den operashon.

E yegada di e avion ta importante, ya ku EZ Air lo kuminsá ehekutá su buelonan pa Medellín na Colombia for di komienso di desèmber anto pa sigurá un operashon stabil, mester tin mas ku un avion ku ta bai operá e ruta aki.

E avion a sali mardugá for di Fort Lauderdale na Florida, pa yega Kòrsou

Kapasidat

Gradualmente lo bai hinka e avion Saab riba mas ruta ku EZ Air ta operá. Di e forma aki, e aerolínea ta ekspandiendo su kapasidat di transportá pasahero bastante na mas ku dos biaha di loke e tabata ta anteriormente.

Gerensia di EZ Air a bisa kaba ku, awor ku e avion ta forma parti di nan flota, lo por trese mas avion di marka Saab si esaki lo mester ta nesesario. E avionnan Saab ta karga 34 pasahero.