Notisia

EZ Air a ehekutá su promé buelo pa Medellín

EZ Air a ehekutá su promé buelo pa Medellín
E promé pasaheronan riba e ruta a pose dilanti avion promé ku a embarká esaki

KRALENDIJK- Djaweps atardi  e promé buelo komersial di EZ Air a sali pa e siudat Kolombiano Medellín. E buelo a sali for di Boneiru 4 or di atardi, pa sigui for di Kòrsou pa Medellín pa 5 or di atardi.

Bandi di kuartu pa shete ora lokal, e buelo a aterisá na aeropuerto José Maria Córdova di Medellín. E avion na aeropuero di Medellín a wòrdu boutisá dor di brantwer di e aeropuerto. Tambe empleado di e kompania ku ta hèndel EZ Air na Medellín a topa e avion ku blas den kolónan di EZ Air. 

EZ Air for di awor lo bula pa Medellín dos biaha pa siman. E buelonan pa Medellin ta sali tur djadumingu i djaweps atardi, i e buelonan di regreso ta Sali for di Medellín mainta trempan riba djaluna i djabièrnè.

Seremonia

Djabièrnè mainta, na yegada di e promé buelo for di Medelín pa Kòrsou, lo tin un seremonia na aeropuerto di Kòrsou, kaminda vários mandatario lo hiba palabra i kaminda lo kòrta bolo pa selebrá e promé buelo aki. 

E buelonan direkto entre Boneiru/Kòrsou i Medellín ta e promé buelonan direkto despues ku e kompania InselAir a bata bankarota.