Notisia

Diputadonan: ‘Mester tuma desishon pa sostené e plan di WEB’ 

Diputadonan: ‘Mester tuma desishon pa sostené e plan di WEB’ 

KRALENDIJK – Despues di bishita di e sekretario di estado nobo di Relashonnan den Reino Alexandra Van Huffelen na Boneiru i e transmishon di Zembla relashoná ku e plan di sostenibilisashon di WEB, diputadonan Nina Den Heyer i Hennyson Thielman ta spera ku ministerio di Asuntunan Ekonómiko rápidamente ta tuma un desishon pa sostené e plan di WEB.

For di 2019 ya kaba a presentá e proposishon na e ministerio. Mas ku dos aña a pasa i te ainda nan no a tuma un desishon. Entretantu komo konsekuensia di subida  di preis di krudo nan a oumentá e tarifanan fuertemente. Esaki lo no tabata nesesario si no tabatin un sin fin di konsulta tokante e proposishon di WEB. 

Speransa

Awor akí mi ta karga speransa ku e gabinete nobo akí lo tuma e desishon korekto i bai sostené e proyekto akí ku ta asina importante pa baha kosto di bida. Van Huffelen a primintí ku despues ku e yega Hulanda bèk e ta bai sinta rápidamente na mesa ku minister di Klima i Energia Jetten. Mi ta sali for di e punto di bista ku e transmishon di Zembla ta yuda pa e ora ei nan hasi e eskoho korekto tambe’, segun Den Heyer.

Importante

‘Pa vários motibu realisashon di e proyekto akí ta sumamente importante pa Boneiru. Banda di e echo ku e ta kuadra kompletamente ku maneho di Entidat Públiko Boneiru pa krese i bira un komunidat sostenibel, e proyekto akí ta sòru tambe ku gastunan di energia pa habitantenan di nos isla ta baha.