Notisia

Daisy Coffie ke pa 2022 bira un aña di ‘desaroyonan deseá’ 

Daisy Coffie ke pa 2022 bira un aña di ‘desaroyonan deseá’ 

KRALENDIJK– Miembro di konseho insular, Daisy Coffie di Frakshon Coffie, ta deseá pueblo di Boneiru un aña 2022 salú, plasentero i eksitoso. “

“Mi ta spera ku e aña akí ta trese tur kos ku ta hasi boso felis, tantu riba tereno privá komo riba tereno profeshonal. Riba tereno gubernamental mi ta spera ku aña 2022 ta bira un aña kaminda mas ku nunka desaroyonan deseá ta keda realisá”. 

Aki Coffie ta pensa riba entre otro enseñansa ku un vishon klarito pa futuro, kombatimentu di pobresa, rekuperashon i kresementu ekonómiko, rehabilitashon di nos kamindanan loke mester kana man den man ku siguridat di tráfiko, mantenshon di nos propio kultura, atenshon pa deporte etc.

Sigui

“Komo Frakshon Coffie mi ke sigui hasi mi trabou di representante di pueblo manera mi a hasié durante e aña ku ta tras di lomba. Mi ta kombensí ku esaki ta na bienestar di funshonamentu di Konseho Insular i di nos gobièrnu. Pa e motibu akí mi ta hasi un yamada na tur habitante di Boneiru pa tuma kontakto ku mi pa asuntunan ku mi por ta na boso servisio kuné” asina Coffie a bisa.