Notisia

CPB BES a organisá workshop tokante Media i privasidat

KRALENDIJK- Riba djabièrnè atardi a tuma lugá un workshop pa media organisá pa College Bescherming Persoonsgegevens BES. E workshop tabata tin komo tema privisadat i media. 

Oradónan di parti di CPB-BES tabata sekretario Roëlla Pourier i di parti di dirketiva di e kolegio, èks gezaghèber Glen Thodé. Di parti di prensa a partisipá Bonaire.nu, The BES-Reporter i NOS-TV. Banda di esaki, tabata tin partisipashon di parti di departamentu di komunikashon di Entidat Públiko Boneiru i Rijksdienst Caribisch Nederland. 

Despues di un introdukshon general, tabata tin espasio pa interkambio entre e partisipantenan. Entre otro a papia tokante uso di pòtret den media i ki ora por konsiderá esaki un violashon di privasidat. Un kos ku a sali na kla den e interkambio ku hopi biaha reglanan no ta tur ora pretu òf blanku, pero hopi ta depende di e situashon partikular i di e sirkunstansianan. 

Tema

Konhuntamente a konkluí ku tin vários tema ku ta interesante pa repasá konhuntamente i tambe pa deliberá kon situashonnan por ta den konflikto ku normanan di privasidat i protekshon di datonan personal i trabou di media. A keda palabrá ku lo bini ku mas seshon pa deliberá riba e diferente tópiko pa yega na un punto di bista komun. 

Pourier i Thodé a mustra nan apresio pa e partisipashon i media tambe a keda kontentu ku e workshop ku a tene.