Notisia

Boneiru ta wak bèk riba un eksitoso DEMA Show 2021

Boneiru ta wak bèk riba un eksitoso DEMA Show 2021
Tourism Corporation Bonaire a eksponé huntu ku nuebe partner den Paviliun Boneiru

KRALENDIJK – E aña akí Crystel Pourier, US & Canada Representative, Annette Emerenciana, Assistant Marketing i Marjolein Oleana, Business Manager a representá Tourism Corporation Bonaire (TCB) for di 16 te 19 di novèmber na e di 45 DEMA Show anual na Las Vegas, Nevada.

E aña akí e evento ku ta dura 4 dia tabata mas chikitu debí na e pandemia, pero tòg hopi negoshi mayorista, ‘influencer’ i amante di Boneiru a bishitá Paviliun Boneiru. E presentenan a bishitá Paviliun Boneiru pa papia tokante nan bishita na Boneiru i pa plania esaki. E aña akí Paviliun Boneiru a konsistí di e siguiente partnernan: BONHATA, Buddy Dive Resort, Captain Don’s Habitat, Courtyard by Marriott, Divi Flamingo Beach Resort, Grand Windsock, Plaza Beach & Dive Resort, Resort Bonaire, Tourism Corporation Bonaire i VIP Diving. 

Hopi di e presentenan a mustra interes pa bishitá Boneiru den 2022 òf 2023. E aña akí TCB a traha huntu ku ScubaRadio pa e premionan di duna bai kuné. Tur dia tabata entregá diferente premio di Boneiru mediante diferente spèl promé ku e shou kuminsá. E ganadónan a keda hopi entusiasmá ku e premionan ku nan a gana i nan ta anhelá pa bishitá nos isla. Captain Don’s Habitat, Divi Flamingo Beach Resort, Plaza Beach & Dive Resort i Resort Bonaire a pone e premionan disponibel. 

E DEMA Show 2022 ta tuma lugá na Orlando, Florida for di 1 te 4 di novèmber.