Notisia

BearingPoint tin konfiansa ku nan lo sali bon for di investigashon anunsiá pa minister di finansa di Kòrsou

BearingPoint tin konfiansa ku nan lo sali bon for di investigashon anunsiá pa minister di finansa di Kòrsou
E ofisina prinsipal di BearingPoint na Rooi Catootje, Kòrsou

WILLEMSTAD- E kompania di konsùltent BearingPoint ta bisa di ta warda ku konfiansa e investigashon anunsiá dor di Minister di Finansa, Javier Sylvana (MFK) dor di Stichting Overheidsaccountantsbureau (SOAB) tokante e destaho públiko i implementashon di e sistema di Servisio di Impuesto di Kòrsou. Un investigashon asina ta aportá mas ainda na transparensia.

“Nos ta sumamente positivo ku e stap anunsiá den prensa. E investigashon ta trese e posibilidat pa sigui ku e diskushonnan basá riba echo i tambe koregí òf evita mal komprondementu tokante di esaki”, asina e kompania ta bisa den un relato di prensa djadumingu atardi. 

Komo BearingPoint, nos ta konvensí di e kalidat di nos produkto- i servisionan, kual pa añanan kaba periodikamente ta pasa den ouditoria eksterno i terminá ku satisfakshon. Ta importante pa sa, ku e sistemanan ku nos a traha (Multi Tax Solution i Multi Collection Solution), ta konsistí di diferente parti, tantu pa heffing di impuesto (na Inspekshon di Impuesto) komo innen di impuesto (na Ontvanger di Kòrsou).

Partik chikí

E kompania ta aklará ku e funshonalidat di ADAF ku a keda menshoná den prensa, pa prosesá deklarashon di impuesto automatikamente, ta solamente un parti chikí di henter e sistema, kual tambe di e total di e invershon. “E parti di impuesto riba entrada (inkluso e funshonalidat di ADAF) a keda diseñá i trahá konforme e eksigensia di Servisio di Impuesto di Kòrsou, di tèst i aprobá dor di kliente i ta funshona eksaktamente manera a palabrá. E porsentahe di deklarashon ku ta bai outomatikamente, ta depende kompletamente riba konfigurashonnan di kontrol definí dor di Inspekshon di Impuesto i tambe e kalidat di informashon di Inspekshon di Impuesto. E dos kosnan aki ta kai for di e influensha di BearingPoint”, segun BearingPoint ta bisa.

Orguyoso

BearingPoint ta sigui bisa di ta hopi orguyoso di e kalidat di su profeshonalnan lokal i internashonal i e echo ku nan ta kontribuí na IT komo un sektor eksportadó generadó di divisas pa e isla. E sistema ta trahá prinsipalmente na Kòrsou, ta rekonosí internashonal i entretantu ta ser usa pa 13 servisionan di impuesto mundialmente ku satisfakshon. “Nos ta spera ku e uso lo oumente den e próksimo añanan na 20 serviosionan di impuesto, ku ta haña asistensia riba nos sistemanan for di nos “solution center” na Kòrsou”, asina e kompania di konsùltant a bisa.

Tambe BearingPoint ta primintí di lo kopera na un investigashon efikas i efisiente dor di SOAB. “Wardando riba tantu e anunsio ofisial i tambe e resultado final, nos lo no sigui komentá mas di esaki públikamente”, asina e relato di prensa ta konkluí.