Notisia

A pesar di hopi krítika mester atmití ku EPB a hasi hopi trabou na kamindanan

Un impreshon di trabounan realisá den lunnan i simannan tras di lomba. Pòtret: ABC Online Media

KRALENDIJK-  A pesar di hopi krítika riba e kolegio ehekutivo formá pa MPB i UPB, mester atmití ku den último simannan a hasi un progreso basta konsiderabel pa loke ta drechamentu di kaminda riba nos isla. 

Hopi hende tabata hopi skeptiko -i asta sínik-, despues di frakaso di rotònde na Kaya Amsterdam. A pesar ku departamento di R&O a saka un plan i tambe un plan den tempu, pa loke ta mehorashon na nos kareteranan, te ku algun siman pasá poko hende por a kere ku lo a sera aña ku un situashon di bastante mehorashon. 

Tòg den lunanan tras di lomba, i espesialmente último par di siman, gobièrnu porfin a logra termina algun trabou di urgensia ku a mehorá e situashon riba nos isla considerablemente. Mester menshoná den e kuadro aki drechamentu di situashon problemátiko banda di Harbour Village, drechamentu di Kaya Piedra Presioso, drechamentu di Kaya Amsterdam, drechamentu di Kaya Neerlandia i drechamentu di kaminda pa subi Seru Largu. 

2022

Ta di spera ku gobièrnu lo por sigui traha ku mesun spit na 2022, manera a terminá aña 2021. A pesar di e progreso realisá, tin hopi mas área ku tin mester di atenshon urgente, anto kaminda ku mester hasi mehorashonan fundamental i struktural. Esaki no ta kita ku mester tòg aploudí e esfuersonan di partikularmente servisio di R&O bou di guía di ingeniero Roy Martina, pa kuminsá trese konfiansa bèd den drechamentu di nos infrastruktura, ku pa dékada largu tabata ta unu hopi deplorabel.