Notisia

A firma kontrato pa konstrukshon di matadero nobo

Direktor di LVV Maurice Adreans, huntu ku diputado James Kroon, Quirina Marchena di Dimi Construction i dirketor di R&O, Roy Martina. Pòtret: ABC Online Media

KRALENDIJK- Djaluna a tuma lugá firmamentu di un akuerdo ku e kontratistanan pa renobashon di e matadero. 

Na e okashon  Maurice Adreans, direktor di L.V.V. a papia i a splika pa nos por kuminsá ku konstrukshon pa un matadero profeshonal. “E proseso a tarda poko pero diputado James Kroon a hasi tur esfuerso pa por yega na e dia di awe, pa  inisiá e proyekto. Esei ta bai sigurá pa un matadero modernisá na Boneiru. Gobièrnu a yuda ku e parti finansiero huntu ku Hulanda. Hopi hende a traha pa yega na e momentu di firmamentu,”Adreans a bisa. 

Diputado James Kroon a papia i a bisa:”Awe ta pone firma pa kuminsá ku renobashon di e matadero. Nos ta hopi kontentu ku trahadónan a sigui duna tur ku tin apesar di e situashon ku no ta masha bon. A organisá e firmamentu riba tereno di L.V.V., paso nan tambe ta den hopi desaroyo. 

Desaroyo

Segun Kroon a splika, ta bai tin hopi mas desaroyo den e área aki. “Ku e proyekto aki, ta nifiká ku hende por ta mas sigurá ku bon produkto lo ta riba merkado. Lo dura mas o ménos 1 aña ta dura pa e edifisio ta operashonal. Pabien pa tur ku a pone skouder bou di e proyekto i awor ta firmamentu pa kontinuashon di e proyekto,”asina Kroon a bisa.  

Despues a sigui firmamentu, Roy Martina, Quirina Marchena direktora di e kompania Dimi Construction, ku ta bai hasi e trabou di konstrukshon i diputado James Kroon.